د ولایتي دفترونو مالي او اداري مدیرانو د روزنیز پروګرام پيل
د ټاکنیزو شکایتونو خپلواک کمیسیون د ۳۴ ولایتونو ولایتي دفترونو مالي اواداري مدیرانو په ګډون سره، نن شنبه (۲۲/ ۹ / ۱۳۹۹) د مالي او اداري مدیریت څلور ورځنۍ روزنیز پروګرام د مرکزي دفتر په روزنیز تالار کې پیل شو.
د پروګرام په پیل کې د ټاکنیزو شکایتونو خپلواک کمیسیون د دارالانشاء عمومي رئیس ښاغلي چمن شاه اعتمادي، په دغه پروګرام کې د کمیسیون ولایتي دفترونو له مالي او اداري مدیرانو ګډون څخه د منني ترڅنګ وویل: تر ډيره هڅه شوي چې په دغه روزنیز پروګرام کې د مالي او اداري برخي پرمختللي روزنیز ډولونو څخه استفاده وشي، تر څو د ولایتي دفترونو مالي او اداري سیستم ستندرد او معیاري شي.
ښاغلي اعتمادي د ولایتي دفترونو مالي او اداري مدیران خپل مسوولیتونو ته متوجه کړل او له هغوی يې وغوښتل چې له دغه څلور ورځني روزنیز پروګرام څخه د خپل ظرفیت جوړونې لپاره ښه ګټه پورته کړي.
همدارنګه د ټاکنیزو شکایتونو خپلواک کمیسیون د وړتیاوو لوړلو آمر ښاغلي عبدالمنان فرهمند سیغاني، د ټاکنیزو شکایتونو خپلواک کمیسیون مرکزي او ولایتي دفترونو کارکوونکو لپاره د ظرفیت جوړونې روزنیز پروګرام د تطبیق په اړه هر اړخیز معلومات وړاندې کړل او وویل: دغه پروګرام په افغانستان کې د ملګرو ملتونو سازمان له ټاکنو څخه د ملاتړ پروژي (UNESP)په مرسته پلی کیږي چې د مسلکي رزونکو لخوا به په عالي توګه تدریس شي.
