د فیفا موسسې له چارواکو سره د ټاکنیزو شکایتونو خپلواک کمیسیون رئیسې لیدنه
د ټاکنیزو شکایتونو خپلواک کمیسیون رئیسې آغلې زهرې بیان شینوارې دوشنبه ( ۶/۱۱/۱۳۹۹) د افغانستان آزاد او عادلانه ټاکنو(فیفا) موسسې له چارواکو سره، د دغه کمیسیون په مرکزي دفتر کې لیدنه وکړه.
دغه ناسته چې د دواړو خوا د اړیکو ټینګښت په موخه جوړه شوي وه؛ لومړی د فیفا موسسې اجرائیوي رئیس د فیفا فعالیتونو او کړنو په هکله هر اړخیز معلومات وړاندې کړل او ټینګار يې وکړ، هغه اصلاحي طرحي او پروګرامونه چې دوی مخکي د ټاکنیزو شکایتونو خپلواک کمیسیون ته سپارلي وي، د دغه کمیسیون په اصلاحي برنامو او د ټاکنو بهیر خوندیتوب او سیستم جوړونې لپاره پام کې ونیسي. په دغې لیدنه کې د فیفا چارواکو وویل: دوی د شکایتونو کمیسیون د ستراتیژیک پلان جوړونې په برخه کې همکاري ته هم چمتو دي.
وروسته د ټاکنیزو شکایتونو خپلواک کمیسیون رئیسې آغلې زهرې بیان شینوارې، د فیفا موسسې له ګټورو مشورو او د کار وړ همکاریو څخه مننه وکړ او د ټاکنو قانون د مسودي، طرزالعملونو، لارښودونو، د شکایتونو کمیسیون ستراتیژیک پلان، ظرفیت جوړنې، د دایمي کارمنانو استخدام او د دغه کمیسیون پلانونو او پروګرامونو په هکله مفصل توضیحات ورکړل.
د شکایتونو کمیسیون رئیسې زیاته کړه؛ هغه طرحي او اصلاحي برنامې چې تیرو ټاکنو تجربو پر بنسټ چمتو او د ټاکنو بهیر لپاره مثبتي پایلي ولري، هرکلی کیږي.
