د ملګرو ملتونو سازمان ځانګړي استازي سره د ټاکنیزو شکایتونو خپلواک کمیسیون د رهبري غړو لیدنه
په افغانستان کې د ملګرو ملتونو سازمان ځانګړي استازي ښاغلي تادامیچي یاماموتو د ټاکنیزو شکایتونو خپلواک کمیسیون د رهبري غړو سره، دوشنبه (۱۳۹۸/۱۰/۲) د شکایتونو کمیسیون په مرکزي دفتر کې لیدنه وکړه.
په دغه لیدنه کې لومړی د ټاکنیزو شکایتونو خپلواک کمیسیون رئیسې آغلې زهره بیان شینواري ښاغلي یاماماتو ته د ښه راغلاست ترڅنګ د ټاکنیزو شکایتونو کړنو او فعالیتونو څخه لنډ معلومات وړاندې کړل، د شکایتونو کمیسیون مشري په افغانستان کې د ملګرو ملتونو سازمان ځانګړي استازي ته ډاډ ورکړ چې د قانون او اړونده طرزالعملونو پر بنسټ به ټاکنیز عدالت پلی کوي.
همدارنګه د ټاکنیزو شکایتونو خپلواک کمیسیون غړي ښاغلي سید قطب الدین رویدار هم وویل: موږ ژمن یو چې د ۱۳۹۸ کال د ولسمشریزو ټاکنو د لومړنیو پایلو په اړه ثبت شوي شکایتونه او اعتراضونه د تیر په شان د قانون پر بنسټ وڅيړو او خپل مسوولیت او دندې په بریالي توګه ترسره کړو.
ښاغلي رویدار زیاته کړه؛ د هیوادوالو له هرې یوې رایې څخه به ساتنه کوو او د شکایتونو او اعتراضونو د رسیدګی بهیر معلومات به له خلکو سره شریکوو.
وروسته د ټاکنیزو شکایتونو خپلواک کمیسیون مرستیال ښاغلي مولوي دین محمد عظیمي د ټاکنو بهیر څخه د نړیوالې ټولنې له مرستو او ملاتړ څخه مننه وکړه او وویل: د ټاکنیز بهیر اوسنیو ستونزو ته په کتو سره، د ټاکنیز عدالت تامین لپاره د ټاکنو قانون او اړونده طرزالعملونو تطبیق سربیره د ملګرو ملتونو جدي ملاتړ ته اړتیا ده.
نوموړي زیاته کړه؛ د ټاکنیزو شکایتونو خپلواک کمیسیون لخوا ۴۵۰۰ شکایتونو ته رسیدنه شوي چې د تصمیمونو په اړه د شکایت کوونکو قناعت هم ترلاسه شوی.
همدارنګه د ناستې په دوام کې د ټاکنیزو شکایتونو خپلواک کمیسیون منشي او ویاند ښاغلي داکتر محمد قاسم الیاسي په افغانستان کې د ټاکنو بهیر بریالیتوب لپاره د ملګرو ملتونو سازمان او نړیوالې ټولني ملاتړ ګټور وباله او ټینګار يې وکړ چې د ټاکنیزو کمیسیونونو کمیشنرانو تر منځ همکاري او همغږي، د ټاکنو قانون او اړونده طرزالعملونو پلي کول او د ملګرو ملتونو سازمان ملاتړ دا پروسه بریالي کوي.
په پای کې د افغانستان لپاره د ملګرو ملتونو سازمان ځانګړي استازي ښاغلي تادامیچي یاماموتو د ټاکنیزو شکایتونو په ولایتي او مرکزي دفترونو کې د شکایتونو او اعتراضونو د رسیدنې څرنګوالي ګټور او د قدر وړ وباله او زیاته يې کړه، له ټاکنیزو ټيمونو سره د دغه کمیسیون وروستی ناسته چې د ټاکنیز بهیر بن بست يې مات کړ د ټاکنیزو ذیدخله خواوو اعتماد يې نور هم زیات کړ.
ښاغلي یاماموتو ټينګار وکړ چې د ملګرو ملتونو سازمان او د ټاکنیزو شکایتونو خپلواک کمیسیون په یو موقف کې ځای لري چې د ټاکنیز عدالت پلي کولو په موخه خپل بی طرفی وساتي او قانون پلی کړي. نوموړي د ټاکنیزو شکایتونو خپلواک کمیسیون له قانوني پریکړو یو ځل بیا د ملګرو ملتونو او نړیوالي ټولنې له هر اړخیز ملاتړ اعلان کړ او یادونه وکړه چې د ټاکنیزو شخړو یواځنی د حل لار د ټاکنیزو بنسټونو د خپلواکی ساتل، د ټاکنوقانون او اړونده طرزالعملونو پلي کول دي.
