د ( UNDP) له مسئول سره د ټاکنیزو شکایتونو خپلواک کمیسیون رئيسې لیدنه

د ټاکنیزو شکایتونو خپلواک کمیسیون رئیسې آغلې زهرې بیان شینوارې په افغانستان کې د ملګرو ملتونو پراختیايې اداري مسوول ( UNDP) ښاغلي عبدالله الدر داري سره، پرون ماذدیګر ( چهارشنبه، ۵/ ۹/ ۱۳۹۹) په خپل کاري دفتر کې ملاقات وکړ، په دغې لیدنه کې دواړو خواوو له ټاکنو څخه د ملګرو ملتونو سازمان د ملاتړ پروژي (UNESP) په سند باندې بحث او په دوه اړخیزو همکاریو  يې ټينګار وکړ.

لومړی په افغانستان کې د ملګرو ملتونو پراختیايې اداري مسوول ( UNDP) ښاغلي عبدالله الدر داري په افغانستان کې د ولسواکی بنسټيز کیدو په اړه، د ټاکنیزو شکایتونو خپلواک کمیسیون د ستاینې تر څنګ وویل: د دوی همکاري به له کمیسیون سره دوام کوي.

ښاغلي الدر داري د ( UNDP) پروګرامونو په اړه، هر اخیز معلومات وړاندې کړل او د ملګرو ملتونو سازمان له ټاکنو څخه د ملاتړ پروژي د بیا تمدیدو خبر يې ورکړ او زیاته يې کړه، د غه پروژه د پخوا په څير له اضافي لګښتونو پرته بیا تمدید شويده.

 نوموړي زیاته کړه، هڅه کوو چې مالي منابعو ته پام سره،  د ملګرو ملتونو سازمان د ۲۰۲۱ کال  ټاکنو څخه د ملاتړ پروژي سند کې، د ټاکنیزو شکایتونو خپلواک کمیسیون وړاندیزونه په پام کې ونیسو او همدارنګه د دغه بنسټ د ستراتیژیک پلان په جوړونه کې فعاله ونډه ولرو. هغه ټينګار وکړ چې دوی په ټولو برخو کې د افغانستان د ټاکنیزو بنسټونو د تقویب لپاره همکاری ته چمتو دي او دواړه کمیسیونونه لکه دوه سترګي ورته ارزښت لري.

وروسته د ټاکنیزو شکایتونو خپلواک کمیسیون رئیسې آغلې زهرې بیان شینوارې، د (UNDP) له همکاريو، فعالیتونو او په ځانکړي توګه د ټاکنیزو شکایتونو خپلواک کمیسیون کې د تجهیز او وړتیاوو لوړلو په برخه کې د (UNDP) همکاريوڅخه ستاینه وکړه او ټينګار يې وکړ چې د دغه بنسټ کاري ټيمونو په هر ډول سختو شرایطو کې له کمیسیون سره مرستې کړیدي.

د ټاکنیزو شکایتونو خپلواک کمیسیون رئیسې د ټاکنیزو بنسټونو د تقویت په موخه، د ملګرو ملتونو سازمان د همکاریو په دوام ټینګار وکړ او وویل: په اوسنیو شرایطو کې افغانستان د ټاکنو ترسره کیدونکو بنسټونو ملاتړ لپاره ډيرو مرستو ته اړتیا لري.

د ناستې په دوام سره، د (UNESP) پروژي مدیر ښاغلي البیاتي له ټاکنو څخه د ملګرو ملتونو سازمان د ملاتړ پروژي د پلي کیدو څرنګوالي په اړه، توضیحات ورکړل او وویل: له دې وروسته به هڅه کیږي چې ډيری تخنیکي مسوولیتونه ټاکنیزو شکایتونو خپلواک کمیسیون ته ورکړي تر څو دغه کمیسیون د ځان بساینه په لور ګام اوچت کړي.

همدارنګه په افغانستان کې د ملګرو ملتونو سازمان د پراختیايې اداري سلاکاري میرمن ناجیه هاشمي، د ټاکنیزو شکایتونو خپلواک کمیسیون د رئیسې په توګه، د آغلې زهرې بیان شینوارې فعالیتونه څخه ستاینه وکړه او وویل: خوشاله یو چې یو بریالۍ میرمن د ټاکنیزو شکایتونو کمیسیون د مشرې په توګه دنده ترسره کوي او دا د افغان میرمنو د لوړ ظرفیت ښکارندويې کوي.

په دغه ملاقات کې د شکایتونو کمیسیون ستر سلاکار ښاغلي عبدالقدیر رؤوفي او د ټاکنیزو شکایتونو د دارالانشاء د پالیسي او همغږي مرستیال، ښاغلي محمد یاسین همراز هم حضور درلود، د پالیسي او همغږي مرستیال د (UNESP) پروژي د تخنیکي او مسلکي همکاريو په اړه، معلومات وړاندې کړل او له دې چې د دغې پروژي په مالي سند کې يې د ټاکنیزو شکایتونو خپلواک کمیسیون وړاندیزونه په پام کې نیولي، مننه وکړه.